Vinaka valevu na veitokoni,oqo e dua na vakasala momona mai vei dua na to taka na ka dina.......

Taumada, au vakatulou saka kina veiyasana kei na kena veidelaniyavu. Au kerea meu na ciqomi kevaka e so na veimala ni vosa ena taubaleci kemuni. Au gadreva ga meu vakaraitaka na lomaqu ena veika sa mai tara tu na noda Viti Lomani.Isa! sa na mua tu evei o Viti ni mataka vei ira na luveda ena vuku ni nodra sa mai buturaki sobu na noda veituraga bale kei na marama bale. Sa evei na veirokorokovi eda dau kilai tani tu kina nai taukei? Sa curumi uciwai tu na bula ni taukei ena gauna oqo. E sa vakavu duadua mai ena kena sa sakitaki na vuli kei na vuku, ka guilecavi na veituberi kei na veisusugi ni noda bula na kawai taukei. Sa ra na sarasara na veiyasai vuravura ena kena sa mai kalawaci nai lago ni noda bula dina nai taukei. Veikemuni na sa mai vinakata mo ni sa liutaka na noda vanua, ni tovolea mo ni na rokataka na bula eda a dui tuberi mai kina. E dua nai vosavosa e vakoto oqo: "NOMU KORO, NOMUI TOVO". Sa kenai vakaraitaki ni veika ni sa mai vakayacora oqo e sa rokataka na nomuni, tabuyani, veikorokoro ko ni dui gole mai kina. Moni na kila vinaka tiko ni sega ni cala na vosa ni Kalou:"Eda na dui tauca ga na vua ni veika eda dui tea".Na kena sa mai tekivutaki na dave ni dra ni lewenivanua esa kauta sara ga mai edua na i yaloyalo ca kivei keda na i taukei. A sega ni nodai yaragi na dakai. Oqori na veika e kau mai me mai taqomaka noda vanua mai vei ira na via vakaleqa na bula ni tamata era lewena noda vanua.E vakacava me ra sa vakalesui na sotia kina nodra dui keba ka me ra vakayagataki ga na ovisa ena kena maroroi na lawa mai vei keda na lewenivanua. Karua, sa kua soti ni kau tiko mai na veimalumalumu era a vakayacora na matanitu sa ra mai vakasivoi ka me sa tosoi ga na kena vakatoroicaketaki na bula ni matanitu kei na lewenivanua. Kevaka eda na raica lesu tale tiko na veimalumalumu oqori, esa na vakaga na Wati Loti [durumasima]. Kivei keimami na lewei Viti tu tani yani, sa duatani na kena mai tarai keimami tu na lomataqaya ena vuku ni veika sa mai yaco ena noda vanua, ka ni keimami leqataki ira na wekai keimami mai Viti. Keimami dau mai sakitaki Viti tu e valagi ni vanua vinaka ni saravanua, ia, oqo sa keimami mai qamuqamuiravatu tu ena kena sa toro sobu na veiliutaki.Kivei kemuni kece na veiwekani mai Viti, ni kakua ni vakacauoca na masumasu ka me na vakalesui vakadodonu tale na veiliutaki kivei ira ga e dodonu me nodra. Kivei kemudou na veiliutaki tiko ena gauna oqo, dou leuta mada na malamala mai na matamudou, me rawa ni dou raica na vinaka kei na ca ni veika dou sa mai vakayacora tu vei ira na lewenivanua ka vakauasivi vei ira na i solisoli ka ra na yaco me ra na veiliutaki talega ena noda vanua ni mataka. Nai yaloyalo dou sa mai vakaraitaka tu oqo e sa i dola ni katuba vei ira na luveda ni mataka me ra na dau vakadadamuria.Me nomuni tiko na veivakalougatataki ni Tamada sa Cecere sara.
May 23, 2007 4:25 AM